Монголд Linux-ийг хэрэглэгчид тийм ч цөөнгүй, бас суулгаж сонирхож байсан хүмүүс ч нэлээд олон болов уу гэж бодогддог юм. Гэсэн ч Windows-ээс бүх нийтээрээ татгалзаж өгөхгүй байгаагийн шалтгааныг
- А. Linux тархацаа оновчтой сонгоогүй
- Б. Тууштай хэрэглэдэггүй, шантардаг
- В. Windows-тэйгээ адилтгаж үзэх, үгүйлэх
- Г. Дассан, зуршсанаасаа салах, шинэ зүйлийг хүлээн авахдаа хойрго зан чанар зэрэгтэй холбож үзэж байна.
За ингээд Windows-ийн оронд Ubuntu-г сонгох шалтгаануудыг тоочъё.
- Ubuntu бол бусад Linux тархацуудын нэгэн адил үнэгүй чөлөөтэй юм. Зүгээр л интернэтээс чөлөөтэй татаж аваад дискэнд бичээд л шууд ашиглах боломжтой.
- MS Office зэрэг програмуудыг худалдаж авах шаардлагагүй болно. OpenOffice ба бусад програмуудыг үнэ төлбөргүй ашиглах боломжтой.
- Одоо хэрэглэж байгаа компьютерийнхээ хүчин чадлыг сайжруулах албагүй. Windows-ийн шинэ хувилбарууд таныг бараг л шинэ компьютер худалдаж авахад хүргэдэг. Ubuntu нь маш бага хүчин чадал шаарддаг учраас таны хуучин компьютерт шинэ амьдрал бэлэглэх болно.
- Ubuntu бол илүү тогтвортой, алдаа багатай, хурдан шинэчлэгддэг. 6 сар тутамд Ubuntu-гийн шинэ хувилбар гарч байхад Windows-ийн шинэ хувилбар хэдэн жилээр хүлээгддэг.
- Вирус гэж санаа зоволтгүй болно. Цөөн хэдэн вирус илэрдэг ч тэдгээр нь сүйдтэй хор хөнөөлгүй. Тиймээс вирусны эсрэг Norton, Kaspersky зэрэг програм худалдан авах шаардлагагүй. Вирусны эсрэг програм ажиллуулахгүй учраас компьютер чинь хөнгөхөн ажиллах болно.
- Монгол хэлийг бүрэн дэмждэг. Windows-ийн хувьд өөрөө монгол үсгийг дэмждэг ч гэлээ дээр нь ажилладаг ихэнх програмын хувьд монгол үсгээр бичнэ гэдэг "гонжийн жоо" байдаг. Тэгээд л монгол гарын драйвер суулгаад.. түүнийг нь дагасан бөөн асуудал босч ирдэг шүү дээ.
- Update Manager гэдэг ганцхан програмаар л бүх шинэчлэлтээ хийчихнэ. Гэтэл Windows-ийн хувьд програм бүрийн шинэчлэлт тусдаа байдаг шүү дээ.
- Хулгайн програмуудаас ангид байх болно. Бүх програмуудыг нь хуулийн ёсны дагуу үнэгүй ашиглах болно.
- Шинэ програм олж авахын тулд эрэл сурал болох шаардлагагүй. Ubuntu Software Center-т мянга мянган програм байдаг.
- Зөвхөн Windows дээр л ажилладаг үнэхээр чухал хэрэгтэй програм байвал Wine, Virtualbox зэрэгт суулгаад ашиглах бүрэн боломжтой.
- Хэдийгээр тоглоом цөөтэй ч гэлээ байгаа хэд нь бас л чөлөөтэй. Бас хайртай тоглоомоо дээрхийн адил Wine-даад тоглосон ч болно л доо.
- 4 desktop-той учраас олон цонхны дунд төөрч будилахын зовлонг эдлэхгүй. Бас дажгүй визуал эффектүүдтэй.
- Таны компьютер өдрөөс өдөрт удааширсаар л байна уу? Тэгвэл ийм зүйл Ubuntu-д байхгүй.
- Windows хэрэглэгчид системийн хурдаа багасгахгүйн тулд байсхийгээд л Defragment хийхлгэдэг бол Ubuntu-гийн хувьд үүнийг үүрд мартана.
- Ubuntu хэрэглэгчид бие биедээ найрсгаар хандаж, уриалгахан нь аргагүй тусалдаг. Элдэв төрлийн зөвлөгөө, заавар интернэтэд хангалттай их байдаг. Харин Windows-ийн хувьд худалдаж авсан мөртөө л ихэнх зүйл нь хаалттай байдаг. Тулгарсан асуудлаа шийдэж чадалгүй орхих үе бишгүй л байдаг.
За үүнээс өөр шалтгаанууд ч бас бий л дээ. Энд олон нийтэд хамаарах нийтлэг хэдийг нь л дурдлаа.
Ubuntu-г хэрэглэж байгаагүй бол сонирхоод үзээрэй. Хэрэглэж байгаа бол битгий шантарч буцаарай.